牛栢葉=Albert Yip

最近聽到嘅新聞，係有高級酒樓將牛栢葉譯成Albert Yip，除咗呢樣，重有好多千奇百怪嘅翻譯，睇完之後都只係覺得係趣聞一則。

但有D人就有好大迴響！有立法會議員話影響香港形象咁話喎～～會唔會誇張咗呀？香港有好多嘢可以令香港蒙羞啦，區區一張酒樓翻譯菜單，無必要被人上綱上線嘅。

反而係成個過程入面，我覺得反映咗一D細微嘅事。首先，成間酒樓都無人發覺張菜單翻譯上出咗問題，呢樣嘢好難令人理解，一個唔識，但都唔會個個都唔識掛？無CHECK過就出街，係好有問題！

另一方面，我就唔係太相信佢哋搵咗一個內地嘅大學生做翻譯，如果你話係香港嘅大學生或者中學生，我反而會信！首先，香港咁多人唔搵，點解會搵咗個內地大學生呢？呢一點已經奇怪，而且係內地嘅大學生，佢哋勤力同求學認真程度，香港學生坐火箭都未必可以追得到，咁馬虎嘅做事方式，大家撫心自問，見得最多嘅反而係身邊嘅香港人，你話係出自內地大學生嘅手筆，我就點都唔會信！

作為食肆，雖然食物質素先係佢哋最重要嘅一環，樣樣嘢都唔應該馬虎了事，但如果連一張菜單出咗咁嚴重嘅問題都發現唔到，咁呢間食肆重值唔值得信賴呢？呢個答案，我留返比大家諗諗……而我呢？我住九龍，天水圍對我嚟講，太遠嗱～～有人請嘅話，當然都會考慮吓啦～～